笨小笨教诲修饰窍诀 (伴奏)歌词由苏曼达瓦演唱，出自专辑《教诲修饰窍诀》，下面是《教诲修饰窍诀 (伴奏)》完整版歌词！
教诲修饰窍诀 (伴奏)歌词完整版
ཞལ་གདམས་མན་ངག་གི་རྒྱན།
教诲修饰窍诀
མཛད་པ་པོ། ༧ མཁན་ཆེན་པདྨ་རྣམ་རྒྱལ།
作词：堪钦白玛南嘉
དབྱངས། ཟུར་མང་ཟླ་བ།
作曲：苏曼达瓦
ཞལ་འདོན་པ། ཟུར་མང་ཟླ་བ།
诵经者：苏曼达瓦
སྒྲ་ལེན་ཁང་། སྒྲ་སྙན་མོ་རོལ་དབྱངས་རིག་གནས་ལས་སྒྲུབ་ཁང་།
录音棚：扎念木音乐文化工作室
ཀྱེ་མ་གཟིགས་ཤིག་དཀོན་མཆོག་ཀུན་འདུས་དྲིན་ཆེན་གྱི་བླ་མ། །
སྤྱི་གཙུགས་འདབ་རྒྱས་པདྨའི་གེ་སར་གྱི་དབུས་ནས། །
བདག་འདྲའི་ལས་ངན་ཟོག་པོ་ཁྱུ་གཅིག་ལ་དགོངས་ཏེ། །
འཁྲུལ་སྣང་ཆོས་སྐུར་གྲོལ་བར་བྱིན་གྱིས་རང་རློབས་ཤིག །
ཐོག་མེད་འཁོར་བའི་དུས་ནས་ད་ལྟ་ནི་ཡན་ལ། །
རིགས་དྲུག་སེམས་ཅན་རྩི་རྩི་གྲངས་མེད་ཀྱི་ལུས་ངན། །
རེས་འགའ་མཐོན་པོ་ཨ་སྔོན་དགུང་མཉམ་གྱི་དཔོན་ཆེན། །
རེས་འགའ་དམའ་གུ་ངན་སོང་ཚ་གྲང་གི་སེམས་ཅན། །
རེས་འགའ་ཕྱུག་པོ་རྣམ་ཐོས་བུ་མཚུངས་ཀྱི་འབྱོར་ལྡན། །
རེས་འགའ་དཔའ་བོ་གངས་དཀར་སེང་འདྲ་ཡི་སྐྱེས་བུ། །
རེས་འགའ་མཛེས་མ་ལྷ་མོ་གཞོན་ནུ་ཡི་བྱད་གཟུགས། །
རེས་འགའ་བཀྲེས་སྐོམ་འདྲེ་སྲིན་ཡི་དྭགས་ཀྱི་ལུས་ངན། །
བླངས་བའི་གྲངས་ནི་ས་གཞིའི་རྡུལ་ཕྲན་ལས་འདས་ཀྱང་། །
བླངས་གོ་མ་ཆོད་ལག་སྟོང་ཤ་སྟག་ཏུ་ལོག་སོང་། །
བསགས་པའི་ནོར་རྫས་རྣམ་ཐོས་སྲས་པོ་ལ་འགྲན་ཀྱང་། །
ཟད་པའི་མཐའ་མ་ཡི་དྭགས་བཀྲེས་སྐོམ་ལ་ཐུག་སོང་། །
དགྲ་བོའི་འདུལ་ཐབས་སྲིན་པོ་གདོང་དམར་ལ་འགྲན་ཀྱང་། །
འདུལ་བའི་ཐ་མ་དམྱལ་བ་ཚ་གྲང་ལ་ཐུག་སོང་།།
གཉེན་གྱི་སྐྱོང་ཐབས་བུ་གཅིག་ཕ་མ་ལ་འགྲན་ཀྱང་། །
བསྐྱངས་པའི་ཐ་མ་གྲོགས་མེད་གཅིག་པུ་རུ་འཁྱམས་སོང་། །
ད་ལྟའི་དགའ་སྡུག་མཐོ་དམན་ཇི་འདྲ་ཞིག་སྣང་ཡང་། །
མི་རྟག་ལས་ཀྱི་དབང་གིས་སོ་སོ་རུ་འགྲོ་དགོས། །
ད་ལྟ་ཁེ་ཉེན་གཉིས་ཀྱི་ས་མཚམས་ལ་ཁེལ་དུས། །
དགེ་སྡིག་གདམ་ག་ནོར་ན་དེ་ལས་ཕུང་ཅི་ཡོད། །
ད་ནི་ཚེ་འདིའི་བྱ་བ་གར་དགའ་རུ་ཐོངས་ལ། །
བླ་མེད་བྱང་ཆུབ་སྒྲུབ་པའི་ཞེ་གདེང་ཞིག་རན་འདུག། །
འདི་ལས་ཕྱི་ན་ཕུང་རྒན་ངན་སོང་དུ་འགྲོ་ཤོམ། །
དེ་རུ་སོང་ན་ཐར་པའི་དུས་སྐབས་ནི་མེད་ཚོད། །
གཏན་དོན་བྱང་ཆུབ་སྒྲུབ་པ་རང་ལག་ན་ཡོད་དུས། །
ཕ་གྲོས་མ་ཤོམ་ཆ་ཆ་ཆིས་ཆིས་ལ་མ་ཟད། །
མི་ངན་སྙིང་རུལ་དམ་པའི་ལྷ་ཆོས་ལ་འཇུག་ཉིན། །
བན་བརྒྱ་བོན་སྟོང་གིས་བྲུབས་པའི་ངན་མཐུ་འདྲ་དུ་ནས། །
ལེ་ལོ་ཕྱི་འགྱངས་སྦུ་རུ་བལ་གཏུམས་འདྲ་འགྱུར་ཉེན། །
མི་དགེ་སྡིག་པའི་ལས་ལ་དགའ་འཛུམ་ནི་ཡ་ལེ། །
འདི་དག་བདུད་ལས་ཡིན་པས་རྒྱང་རིང་དུ་དོར་ལ། །
བྱང་ཆུབ་དམ་པའི་སྒྲུབ་པ་འཁོར་ཡུག་ཏུ་སྐྱོངས་མཛོད། །
ཤེས་བྱའི་ཆོས་ཚུལ་རྒྱ་ཆེན་ནམ་མཁའ་དང་མཉམ་ཡང་། །
འོ་གཡུག་མར་གྱི་སྙིང་པོ་མདོ་རྒྱུད་ཀྱི་མན་ངག །
སེམས་ཉིད་ཚུལ་བཞིན་ཤེས་ན་འཁྲུལ་མེད་ཀྱི་སངས་རྒྱས། །
སེམས་ཉིད་རང་ངོ་མ་ཤེས་འཁྲུལ་བཅས་ཀྱི་སེམས་ཅན། །
རིག་དང་མ་རིག་འདི་གཉིས་འཁོར་འདས་ཀྱི་ས་མཚམས། །
དེས་ན་རང་སེམས་ལས་གཞན་སངས་རྒྱས་ནི་མེད་ཐག །
ཕྱི་ལྟར་ཚོགས་དྲུག་ཡུལ་སྣང་རྨི་ལམ་གྱི་ཡུལ་ལྟར། །
རང་སེམས་འཁྲུལ་པའི་རྩལ་ལས་གཞན་དུ་ནི་མ་གྲུབ། །
ནང་ལྟར་འཛིན་པའི་རྣམ་རྟོག་རང་ངོ་ལ་བལྟས་པས། །
རྣམ་པ་འདི་མཐོང་བྲལ་བ་ཐ་མལ་གྱི་ཤེས་པ། །
ཧད་དེ་ཆད་དེ་རྒྱ་ཡན་རང་སོ་ན་སྐྱུར་ཐོངས། །
སེམས་ཉིད་བལྟས་པས་མི་མཐོང་བཞག་པས་ཀྱང་མི་འདུག །
དེ་བཞིན་བཟུང་བས་མི་ཟིན་དེད་པས་ཀྱང་མི་དོར། །
རྣམ་རྟོག་རང་ངོ་ཤེས་ན་གར་སོང་དུ་སྐྱུར་ཐོངས། །
འགྲོ་མཁན་མེད་པ་གཞི་མེད་རྩ་བྲལ་དུ་འགྱུར་འགྲོ། །
བལྟས་པས་མ་མཐོང་ངང་ན་རྒྱ་ཡན་དུ་སྐྱུར་ཐོངས། །
བཞག་པས་མི་འདུག་ཙ་ན་གར་དགའ་རུ་གློད་ཐོངས། །
སེམས་ཉིད་བཟུང་བས་མི་ཟིན་ཤོར་ཤོར་འདྲ་འདུག་ན། །
གར་དགའ་གང་དགའི་གནས་སུ་ཅི་དགའ་རུ་འགྲོ་ཆུག །
ཚོགས་དྲུག་བཟང་པོའི་ཡུལ་སྣང་རང་སེམས་ཀྱི་འཁྲུལ་སྣང་། །
དེ་ལ་ཆགས་ཞེན་སྐྱེས་ན་ཆགས་ཐོག་ཏུ་སྐྱུར་ཐོངས། །
ཚོགས་དྲུག་ངན་པའི་ཡུལ་སྣང་རང་སེམས་ཀྱི་འཁྲུལ་སྣང་། །
དེ་ལ་སྡང་བ་སྐྱེས་ན་དེ་ཐོག་ཏུ་སྐྱུར་ཐོངས། །
དཔེར་ན་རྨི་ལམ་འཁྲུལ་སྣང་བཟང་པོ་དང་ངན་པ། །
བཟང་པོའི་སངས་རྒྱས་རྨིས་ཀྱང་རང་སེམས་ཀྱི་འཁྲུལ་སྣང་། །
ངན་པའི་འདྲེ་སྲིན་རྨིས་ཀྱང་རང་སེམས་ཀྱི་འཁྲུལ་སྣང་། །
རྨི་ལམ་ཡིན་པར་ཤེས་ན་ཆགས་སྡང་དང་འཇིགས་སྐྲག །
ཐམས་ཅད་རྫུན་པའི་ངང་ནས་བདེན་མེད་དུ་རང་གྲོལ། །
དེ་བཞིན་ད་ལྟའི་ཡུལ་སྣང་བཟང་པོ་དང་ངན་པ། །
ཐམས་ཅད་སེམས་སུ་ཤེས་ན་འཁྲུལ་ཡུལ་ནི་མ་གྲུབ། །
སེམས་ཉིད་རང་ངོ་བལྟས་པས་འཁྲུལ་མཁན་ཀྱང་མ་གྲུབ། །
གཟུང་འཛིན་མ་གྲུབ་ཙ་ན་བདག་འཛིན་ཀྱང་མི་གྲུབ། །
ཚིག་ངན་ཙམ་གྱིས་ན་བའི་བདག་འཛིན་ལ་བལྟས་ན།།
མ་བདེ་ཀ་རེ་བ་ཡང་གར་སོང་ནི་མི་འདུག། །
མེད་བཞིན་འཁྲུལ་པའི་རང་མཚང་ཧངས་སེ་རུ་ཤེས་ནས། །
བཟང་ངན་རྫུན་པའི་ངང་ན་རོ་སྙོམས་སུ་སྐྱུར་ཐོངས། །
ལུས་ཀྱི་འགྲོ་འདུག་འདི་བྱ་སྙམ་པ་རང་ཤར་ཚེ། །
འགྲོ་འདུག་བྱར་མེད་ངང་ན་རོ་སྙོམས་སུ་སྐྱུར་ཐོངས། །
ངག་གི་སྨྲ་བརྗོད་འདི་བྱེད་རྟོག་པ་རང་ཤར་ཚེ། །
སྨྲ་བསམ་བརྗོད་མེད་ངང་ན་རོ་སྙོམས་སུ་སྐྱུར་ཐོངས། །
སྣང་བ་སེམས་སུ་རྟོགས་ན་བཟང་ངན་ནི་རོ་སྙོམས། །
སེམས་ཉིད་སྟོང་པར་ཤེས་ན་ཆགས་སྡང་ནི་རོ་སྙོམས། །
ཐམས་ཅད་སྟོང་པར་རྟོགས་ན་རྨི་ལམ་ནི་ཇི་བཞིན། །
མཁའ་ལ་འཕུར་དང་རི་བྲག་ཟང་ཐལ་དུ་འགྲོ་ཞིང་། །
རྫུ་འཕྲུལ་ཡ་མ་ཟུང་ཡང་རང་བྱུང་དུ་འགྲོ་སྐད། །
མདོར་ན་མཉམ་བཞག་རྒྱ་ཡན་ནམ་མཁའ་ལྟར་གློད་ཐོངས། །
སྐབས་དང་སྐབས་སུ་བླ་མའི་མོས་གུས་དང་བསྲེས་ལ། །
ཡུན་ཐུང་གྲངས་མང་ཉིན་མཚན་འཁོར་ཡུག་ཏུ་སྐྱོང་བའི། །
མཉམ་བཞག་ཐུན་ཚོད་ཇེ་རིང་ཇེ་རིང་ལ་བསྲིངས་ན། །
ནམ་ཞིག་ཉིན་མཚན་མེད་པར་འཁོར་ཡུག་ཏུ་འགྲོ་ཚེ། །
ཅི་སྣང་ཅི་དྲན་འོད་གསལ་ཆོས་སྐུ་རུ་ལྷང་ལྷང་། །
བཟང་ངན་ཐམས་ཅད་སྒོམ་མེད་ཡེངས་མེད་དུ་ཤར་ཤར། །
འཁྲུལ་པའི་རང་མཚང་སེམས་ཉིད་ཆོས་སྐུ་རུ་དིབ་འགྲོ། །
རྗེས་ཐོབ་རྨི་ལམ་དང་བསྲེ་གང་ཤར་དུ་བསྐྱུར་ན། །
ཆགས་མེད་སྡང་མེད་རྣལ་འབྱོར་བྱ་བཏང་གི་ཡང་རྩེ། །
སེམས་ཉིད་རང་ངོ་ཤེས་ན་ལྟ་བ་ཡི་མཐར་ཐུག །
དེ་ཉིད་འཁོར་ཡུག་བསྐྱངས་ན་སྒོམ་པ་ཡི་མཐར་ཐུག །
གང་ཤར་དེ་ཐོག་གློད་ན་སྤྱོད་པ་ཡི་མཐར་ཐུག །
འཁྲུལ་པའི་རང་མཚང་ཞིག་དུས་འབྲས་བུ་ཡི་མཐར་ཐུག །
མོས་གུས་མེད་ན་རྟོགས་པ་སྐྱེ་ཐབས་ནི་མེད་ངེས། །
སྙིང་རྗེ་མེད་ན་གཞན་དོན་འགྲུབ་ཐབས་ནི་མེད་ངེས། །
གནད་ཀྱི་མདོ་དོན་འདི་ལས་ཞུ་རྒྱུ་ནི་མི་འདུག །
གནད་དོན་འདི་ལ་མ་འཆུགས་ཕ་བཟང་གི་བུ་ལུ། །
གནད་དོན་འདི་ལ་མ་འཆུགས་ཕ་བཟང་གི་བུ་ལུ། །
